نتايج الثانوية والبروفيه عإيامنا!
كنا نتجمع كلنا سوا ببيت واحد باستثناء يلي خايفين عوضعن… نحط الراديو بالنص وكأنو شبح أسود عم يطلع منو أصوات…
شوي بتسمع صوت مذيعة بلشت تقرأ أرقام… بتحس صوتا بيشبه صوت الجن والقرينة… وبتبلش تصف أرقام ويا ويلك إذا تشردقت بشي رقم قريب عرقمك… بتجيك السكتة القلبية إنت والسليلة كلها… ويا ويلك إذا انقطعت الكهربا… بتنقطع حواسك من محلا…
شوي بتنط القرينة شي خمسين رقم بيروح معن ضحايا وأضرار جانبية… أما إذا نجحت بتنط تبوس الراديو أول شي وبتصير ناطر رئيس المدرسة يدقلك يباركلك وكأنو الوزير بذاتو عم يتصل فيك وعارف أصلك وفصلك.
رزق الله شو كنا نتبهدل بس كان في لذة رهيبة!

الإمضاء
الناجحة في مباراة الأسباب المباشرة لاندلاع الحرب العالمية
Lara Sleiman Noun

ان المعلومات و الاراء و الافكار الواردة في هذا المقال تخص كاتبها وحده و تعبر عن وجهة نظره الخاصة دون غيره؛ ولا تعكس، باي شكل من الاشكال، موقف او توجهات او راي  او وجهة نظر ناشر هذا الموقع او ادارة تحريره.
ان هذا الموقع و ادارة تحريره غير مسؤوليين عن الاخبار و المعلومات المنشورة عليه، و المنسوبة الى مصادرها بدقة من مواقع اخبارية او وكالات انباء.