رح نرجع… وبالكَم ليرة يلي معنا ياهن… رح نحضر مهرجانات… ونرقص عالطاولات…
رح نرجع… حاملين جروحاتنا… ولابسين أحلى تياب…
رح نرجع… ونعزم أصحابنا… ورفاقنا… ومن الموجود رح نجود…
رح نرجع… إذا جمعنا قرشين… رح نسافر فيهن… ولو بقينا على كذا شهر بلا مصاري…
رح نرجع… نعمل أعياد واحتفالات… نرقص ونغني… لأنو بكرا… مش مضمون…
رح نرجع… نشتري أحلى باقات ورود… نزين فيهن بيوتنا… ومناسباتنا… ومدافن يلي راحوا…
رح نرجع… بَحصة بعين كل يلي استكتروا عالشعب اللبناني يعيش…
لأ نحنا شعب مش سطحي… لأ نحنا شعب مش تافه… نحنا شعب بيحب يعيش… واذا اليوم اشترينا تلفون بقيمة معاشنا… واذا اليوم اشترينا بالدَين سيارة… وبالدين تزوجنا… مش غلط… عالقليلة بالحلال… طالما ولاد الحرام… ولاد الحروب… ولاد الموت ناطرينا عكل مفرق…
ما منلحق نخلص من حرب… حرب تانية بتكون ناطرتنا عالباب… وبين الحرب والحرب… عم نحاول نعيش…
أوعا تفكروا رح نستسلم… اوعا تفكروا رح تأثروا فينا… هني كم يوم… كم يوم… ورح نرجع… نرقص نغني ونسافر ونجتمع… بالوقت يلي باقي… وبالمصريات يلي بعد ما انسرقوا… رح نرجع…

ان المعلومات و الاراء و الافكار الواردة في هذا المقال تخص كاتبها وحده و تعبر عن وجهة نظره الخاصة دون غيره؛ ولا تعكس، باي شكل من الاشكال، موقف او توجهات او راي  او وجهة نظر ناشر هذا الموقع او ادارة تحريره.
ان هذا الموقع و ادارة تحريره غير مسؤوليين عن الاخبار و المعلومات المنشورة عليه، و المنسوبة الى مصادرها بدقة من مواقع اخبارية او وكالات انباء.