صباح الخير يا رفيقة
صباح الخير مش اليوم وبس
ولا مبارح ولا بكرا وعل معس
لا
صباح الخير يعني لما تطلع مني
وقولها لرفيقة
يعني ختم بشمع مخلد ما بدوب
يعني وشم دقيتو ع إيد الصبح
كل يوم يفيقك ب إيدو
تيصفي فيكي القلوب
يا رفيقة ما تزعلي مني يوم
ولا ساعة ولا لحظة ولا بعيونك
تطلعي فيي بالمقلوب
كل القصة اني صرت ما حدا
مش عم حب غير قطر الندى
بسابق النوم تإغفى قبلو
بلكي ع قهوة الصبح بسبقو
بعرف بتحبي السهر
وحكيات السَمَر
بعرف انك احلا رفيقة
بعرف اني مقصر يمكن
عقلي صاير بلا وقت
ضايع بين تكة ودقيقة
مقضي حياتي عل السكت
ناطر ومش ناطر
لا بحمل ضغينة ولا حقد
ولا بفكر بمصلحة
ولا بشحد كلمة رقيقة
ليكي
طب ما ليكي
مين اول ما يفتح عيونو
بيكمش تلفونو
وقبل ما صبّح الصبح بقول
صباح الخير يا رفيقة

ان المعلومات و الاراء و الافكار الواردة في هذا المقال تخص كاتبها وحده و تعبر عن وجهة نظره الخاصة دون غيره؛ ولا تعكس، باي شكل من الاشكال، موقف او توجهات او راي  او وجهة نظر ناشر هذا الموقع او ادارة تحريره.
ان هذا الموقع و ادارة تحريره غير مسؤوليين عن الاخبار و المعلومات المنشورة عليه، و المنسوبة الى مصادرها بدقة من مواقع اخبارية او وكالات انباء.